Tagebuch
31. Oktober 2006
Hüt, a mim 25. Geburtstag, het mi mi Schatz gfragt ob i ne wot hürote. I bi überglücklech und fröie mi ungloublech uf dä Tag!!
17. November 2006
Mir si ungerdesse scho x Chiuchene ga aluege. Zur Uswahl stöh Guggisbärg, Neuenegg, Zimmerwald oder Burgistein. Da üses Wunsch-Hochzyts-Datum dr 07.07.2007 isch, hei mir afe überall chli provisorisch reserviert!
16. Dezember 2006
Hüt si mir mit üsne Trouzüge z'Hotel Restaurant Ottenleuebad ga aluege. E Müglechkeit wo mir üses Fescht chönte mache. Es hüt üs überzügt. Hasler's hei viu gueti Idee gha! Z'Problem isch numeno das d'Schlafglägeheite chli knapp si...
31. Dezember 2006
Mir hei mit üsne Trouzüge, Pädu und Sarah Silvester gfiiret. Natürlech hei mir ou chli a üsere Hochzytsplanig witergstudiert. Mir müesse Kompromisse iga. Ganz so wie mir üs das vorgstellt hei isches äuä nid realisierbar! Aber es chunt guet :-)
04. und 05. Januar 2007
Mi Schatz het sini zwe letschte Ferietäg wöue nütze zum sis Hochzyts-Outfit z'organisiere. Isch leider nüt drus worde...si hei ne wieder hei gschickt :-) I mues zersch wüsse wie mis Hochzytschleid söu usgseh!
Mir hei üs für d'Chiuche in Neuenegg entschide und definitiv reserviert. Am 07.07.2007 am haubi zwöi am Namittag wärde d'Glogge für üs lüte!
Ou am Hotel Restaurant Ottenleuebad hei mir definitiv zuegseit!
08. Januar 2007
Mir hei z'Datum für die zivili Trouuig provisorisch reserviert. Am 01.06.2007, am zwöi, isches sowit!
19. Januar 2007
Mir hei es witers Träffe mit üsne Trouzüge gha. Mir si i üsere Planig es guets Stückli witercho und jede het für die nächschte zwöi Wuche viu Ufgabe zum erledige bercho :-)
Die zwöi mache das würklech super und ig bi ihne u dankbar!! Merci scho mau!!
24. Januar 2007
Jupii, hüt hani ändlech dr Prototyp vo üsne Iladigschärtli fertiggstellt. Jetz geiht's nume no ums drucke und verschicke...ändlech!
27. Januar 2007
Hüt bini mit mim Schatz und de Trouzüge z'Thun im Brutmode-Gschäft gsi und i ha MIS TROUMCHLEID gfunge. Natürlech hani dr Tinu wäggschickt bevor i mir definitiv entschide ha :-)
02. Februar 2007
Hüt si üsi Trouzüge wieder bi üs verbii cho. Mir si nid ganz mit so grosse Schritte vorwärts cho wie bim letschte Mau. Das het aber äuä chli dermit z'tüe das mir nid ganz aui vo üsne Ufgabe erlediget hei gha. Sorry!
04. Februar 2007
Hochzytsmäss z'Bärn: Mir hei üsi Ringe usegläse und bschteut!! (Leider hei mir z'Budget scho wieder überzoge, oje!) Schüsch hei mir aber nid so viu gfunge wo üs hät chöne witerhäufe!
Am Abe si mir no bim Renatô u bir Susanne gsi für ds Apéro z'bespräche. Ou das chunt gloub guet. Är het gueti Idee und Tipps für üs gha!
07. Februar 2007
Es cha nid immer aues Rund loufe: D'Papeterie hets fertig bracht scho zum zwöite Mau z'fausche Papier z'bsteue... das brucht Närve!!
18. Februar 2007
Hüt si mir nomau d'Umgäbig rund um d'Chiuche ga uskundschafte, uf dr Suechi nacheme geignete Ort für üses Apéro, faus dr Petrus de öpe doch nid söt mitspiele. I gloub mir hei öpis passends gfunge...
20. Febraur 2007
Hüt wärde üsi Iladige verschickt. Mir fröie üs scho uf die erschte Reaktione und hoffe müglechscht viu Amäudige chöne entgäge z'näh!
22. Februar 2007
Geschter bini mit üsere Trouzügin is Bastelzentrum ga ichoufe für für d'Namens- und Tischchärtli. Isch gar nid so eifach gsi öpis z'finge wo mi überzügt het. Aber jetz chani loslege sobald mir die erschte Amäudige überchöme.
23. Februar 2007
Üsi Iladige si bi de Lüt itroffe und mir hei bis jetz nume positivs drüber ghört. Juhuu!!
Hüt Abe hani d'Christelle, e super Kollegin, nach x Mönet wieder troffe. Si läbt z'Jersey und i fröie mi extrem das sis probiert müglech z'mache am mim grosse Tag derbii z'si! Das wär es riese Gschänk für mi, we das würd klappe!
02. März 2007
Hüt isch ou dr Tinu bim Thomi z'Thun ikleidet worde!
03. März 2007
Hüt si mir mit üsne Trouzüge is Ottenleuebad ga ässe. Mir hei mit Haslers (z'Wirtepaar) die letschte Details besproche, d'Wiine degustiert :-) und z'Menu definitiv bsteut!
10. März 2007
Hüt si mir üsi Ringe ga abhole. Si gseh eifach super us!!! Leider hei mir deheim gmerkt, das am Tinu sine doch e chli z'gross isch! Hoffentlech chame dä ohni grossi Chöschte umtusche oder la verchlinere...
20. März 2007
Hüt hani agfange mit de Namensschildli für d'Hochzytsgäscht. Mir hei zwar leider nonid ganz alli Amäudige, aber das Baschtle git ja glich no rächt viu z'tüe. Vorallem da ig vom Tinu bi sörige Sache nid all zu viel Ungerstützig mues erwarte. Är isch da ender fürs Gröbere zueständig :-)
21. März 2007
I ha hüt ändlech es Chleid gfunge für die zivili Trouuig. Isch doch einiges schwieriger gsi da öpis passends z'finge, aus bim Brutchleid. Dört hani eifach gwüsst "entweder das oder kes"!
30. März 2007
I ha jetz ou die passende Schueh zu mim Troumchleid! I ha vorhär scho chli im Internet umegstöberet, da ig ja keni Schueh mit höche Absätz ha chöne bruche. Im Brutschuehlade z'Nidau bini fündig worde. Si si fasch flach und MEGA bequem. Sie heisse nid für nüt "Wolke 7". Mi füeuht sich würklech aus würd me uf Wuuche loufe. I cha dä chli aber fiin Lade nume empfähle!
01. April 2007
Genau i zwöi Mönet wärde mir üs im Chornhuus z'Köniz z'Ja-Wort gä... und das isch ke Scherz!!
Ungloublech wie schnäu die Zyt vergeiht...
04.-07. April 2007
Mir hei 3 schöni Täg in Davos verbrocht. Nid ganz "unzuefällig" het am Donschtig no dr SCB gspielt :-) Schüsch hei mir üs chli im Wellnessberiich vom eau-là-là la verwöhne und z'schöne und warme Wätter gnosse.
10. April 2007
I ha üs hüt füre obligatorisch Ehevorbereitigskurs agmäudet. Mir chöi üs zwar nonid rächt vorsteue was üs da erwartet... aber mir wärdes gseh! Vilicht müesse mir ja no e Eignigstescht absolviere :-)
14. April 2007
Mir hei jetz doch no öper gfunge wo id Chiuche chunt cho singe. Zwar nid "üses" Lied...das isch chli schad...aber es wird sicher trotzdäm sehr schön. Merci, Sarah, fürs organisiere!
21. April 2007
Hüt hani trotz schönschtem Wätter ca. 6 Stung dermit verbracht üsi Tischchärtli z'kreiere. Ou d'Namensschildli si ungerdesse fertig worde. Si gseh würklech guet us. I gloube z'"Knübel" und die vieli Arbeit hei sich glohnt!
30. April 2007
Mir hei hüt dä "Ehevorbereitigskurs" im Schloss z'Bümpliz gha und gloub ou bestande :-) Het ja nid würklech viu miteme Kurs z'tüe gha, zum Glück! Mir hei die nötige Papier verbii bracht und auerhand Formular ungerschribe!
05. Mai 2007
Hüt bini mit dr Sarah ga d'Blueme für die zivili und die chirchlechi Trouuig bsteue. Ou d'Dokartion für d'Chiuche hei mir organisiert. I liebe Blueme und drum isch mir das ou sehr wichtig gsi! I fröie mi sehr uf mi Brutstruss!
10. Mai 2007
Mi merkt, dases lansam i Ändspurt geiht. I de nächschte Täg stöh wieder es paar Sache ufem Programm. Am Samschtig wird z'erschte Mau z'Make-up teschtet, nächscht Zyschtig träffe mir üs mit üsem DJ und am Fritig chani ändlech ändlech wieder mau mis Chleid ga apropiere!!! I ma scho fasch nüm warte :-)
11. Mai 2007
Geschter bini mit mine Eltere z'Biel a Abeverchouf... mitem Ziel se fürs Hochzyt izchleide. Wär vorallem mi Vater kennt, cha sich öpe vorstelle das das gar nid so eifach isch. Es gränzt scho anes Wunder das er überhoupt id Stadt isch cho :-) Schlussändlech hei mir ihm - mitem Verspräche das är se nachem Fötele sofort wieder darf abzieh und är z'oberschte Hemmlichnöpfli nid mues zuetue - sogar e Krawatte ufgschnuret ;-) Mis Mami het es uu schöns Chleid kouft. Gseht super us!!!
18. Mai 2007
Hüt hani ändlech mis Chleid wieder dörfe ga aprobiere. Es isch eifach perfekt!!!
I ha scho fasch e chli Angscht gha dases mir de plötzlech nüm gfaut, wüu igs ja scho sooo lang nüm gseh ha. Aber i ha mi grad wieder vo neuem dri verliebt!
27. Mai 2007
Geschter hei mir beidi üse Polterabe gha. Mine isch eifach genial gsi. I ha natürlech ou super usgseh mit mim riesige Huet und mim Top wo äxtra für mi isch designt worde. Und dank däm das mi "Lade" ou nid schlächt isch gloffe, hei mir dr Abe oder d'Nacht scho fasch finanziert gha :-)
30. Mai 2007
Hüt bini mini Fingernägel fürs Hochzyt ga "style". Gseht super us... nume bini wahrschinlech morn am Compi de chli überforderet. Blibe sicher hange zwüsche de Taschte :-)
31. Mai 2007
Morn isches sowit...üsi zivili Trouuig!! Das heisst hüt afe mau no chli Ungerschrift üebe :-) Langsam chunt scho chli es komisches Gfüeu uf... aber i fröie mi sehr! Leider wot z'Wätter nid ganz so wie mir...houptsach es spielt de am 07.07. mit!
2. Juni 2007
Mir is jetz offiziell Ma und Frou!!! Es isch e verrägnete, aber trotzdäm wunderschöne Tag gsi für üs.
04. Juni 2007
Mi erscht Arbeitstag als Frou Greutmann hani überstange. I bi auso rächt souverän gsi bim Telefon abnäh... aber es isch scho e ziemlechi Umstellig :-)
07. Juni 2007
Geschter hei mir ds Gspräch mit üsere Pfarrerin gha. I bi sicher das das e super Trouig wird gä. Si fieberet richtig mit üs mit!
15. Juni 2007
Am Wuchenänd si mir wieder mau chli mit üsem Wunschbuech ungerwägs. Merci scho mau aune, wo mirs dörfe ga verbii bringe!
18. Juni 2007
Isch wieder einiges gloffe am Wuchenänd bi üs. Am Fritig hei mir bir Margrit und bim Beat fein gässe und imene chlyne Crash-Kurs Walzer und Disco-Fox wiederholt. Mau luege ob das no öpis wird ;-) Am Samschtig hei mir e gmüetleche Namittag/Abe bi mine Groseltere gha und am Sunntig hani nach extrem langer Zyt mini Gotte wieder mau gseh! Isch es cools Weekend gsi. I dere Wuche geiht's grad ähnlech witer: Maniküre, Geburtstag vom Tinu, Bsuech bi Tinu sim Gotti, Probeschminke...üs wirds ir nächschte Zyt würklech nid längwilig :-)
22. Juni 2007
Mir hei ungerdesse scho sehr viu Gschänk zu üsem Hochzyt bercho. Merci viu viu mau für die EXTREM GROSSZÜGIGE Biträg a üsi Flitterwuche!!
23. Juni 2007
Z'Probe-Make-up, wo mir d'Andrea hüt gmacht het, isch würklech tiptop cho. Nid z'starch und nid z'schwach...super! Es het sogar am Tinu gfaue ;-) Später si mir de nomau bi "üsere" Chiuche verbii...
28. Juni 2007
Es geiht jetz definitiv i Ändspurt. Morn hei mir z'letschte Träffe mit üsne Trouzüge und am Samschtig chöi mir ändlech zum Thomi üsi Chleider ga abhole. I mues mir numeno überlege wo dasi mis Chleid für die letschti Wuche noch verstecke :-) Dr Tinu chönts eh nid la si und würd ga gwundere!!
02. Juli 2007
So, mir hei mit üsne Trouzüge die letschte Details klärt, hei üsi Chleider abgholt und nomau aprobiert und aues was mir für am Sunntig bruche ou scho packt und abglieferet! Langsam wirdi äuä doch chli närvös. Ha letscht Nacht zum erschte Mal nid chöne ischlafe wüu mir soviu Sache wägem Hochzyt düre Chopf si :-)
03. Juli 2007
D'Wätterprognose füre Samschtig wird vo Tag zu Tag besser. Isch eifach genial!!! Wahrschinlech hets doch gnützt, dasi äxtra e wisse Rägeschirm kouft ha...jetz chani ne ja de aus Sunneschirm bruche ;-)
05. Juli 2007
Geschter hei mir nomau überem "Hochzytstanz" brüetet. Es paar schöni Walzerstück hätte mir gfunge, aber üse PC wot nid wie mir wei und mir chöi d Lieder nid uf CD brönne. Aber das meischtere mir ou no irgendwie :-)
NO 2 MAU SCHLAFE...
07. Juli 2007
Üse gross Tag fot für mi scho am 6i a! Obwohl mir doch gar nid närvös si, si mir beidi scho ab de 4i wach im Bett gläge :-)
Am 7 musi bir Andrea si, wo mi schminkt und de när grad diräkt zum Coiffeur!
11. Juli 2007
Üses Hochzyt isch eifach wunderschön gsi. Sicher ou dank däm, das dr Wätterfrösch äxtra für üs, für ei Tag e Rägepouse igleiht het. Es het am Sunntig sogar no grad glängt, zum uf dr schöne Terasse vom Ottenleuebad zmörgele!
Langsam hei mir ou Zyt z'realisiere, was mir aues a däm Tag erläbt hei und üse riesig Gabetisch no chli z'bestuune...
14. Juli 2007
Hüt hei mir vo mim Unggle die erschte Föteli bercho. I bi uu gspannt gsi... aber si si eifach super!
Ir Nacht vom Sunntig ufe Mäntig verreise mir i die "1. Flitterwuche" nach Kroatien. Üsi Homepage wird i dere Zyt haut chli vernachlässiget wärde. Derfür chöme de we mir deheim si, die erschte Föteli vo üs druf! Dörft also ruhig witerhin regumässig verbii luege ;-)
26. Juli 2007
Mir si zrüg!!
Üsi Ferie in Kroatien und Italien hei mir mega gnosse. Sunne, Strand und Meer, genau so wie mirs gärn hei...
Im volle Briefchaschte hei mir hüt d'Föteli vor Fotografin vorgfunge! Jupii!!
Die wärde üs sicher chli übers Ändi vo üsne Ferie hinwäg tröschte...
30. Juli 2007
Die erschte Föteli vom 07.07. si online!
Na dis na wärde sicher no meh cho, aber da müesst dir üs no chli Zyt la...
03. August 2007
Ungerdesse hei mir d'WC-Papier-Päckli Nr. 3 und 4 uf dr Poscht abgholt! Mir si gspannt was üs no aues erwartet :-)
20. August 2007
Üsi Homepage wird leider i letschter Zyt chli vernachlässiget. Mir si aber halt immerno wie wild am Dankeschärtli und Fotoalbum baschtle. Das mues aber natürlech nid heisse, das dir üses Gäschtebuech i dere Zyt müesst la verhungere :-)
31. August 2007
Ändlech! Üsi Dankeschärtli si geschter uf d'Poscht und söte hüt bi de Lüt iträffe...
24. September 2007
Üsi Familie berchunt Zuewachs :-) Am Donschtig zieh dr Gizmo und dr Filou bi üs i...
08.-09. Oktober 2007
Mir hei Ferie und zwe schöni, romantischi Täg im Hotel Worbenbad verbrocht. Chli Wellnesse, fein Ässe unds üs eifach la guet ga...
15. Oktober 2007
Mir hei geschter üsi Flitterwuche buechet! Jupii, i fröie mi mega!!!! Meh erfahret dir de unger Flitterwochen...
31. Oktober 2007
Genau hüt voreme Jahr het mir mi Schätzu dr Hüratsanrag gmacht. Ungloublech wie schnäu d Zyt vergeiht...und glich hei mir i dere Zyt u viu erläbt!